Luk 2:1-20 -- Testament Noweth, treylys gans Nicholas Williams

1Y wharfa y’n dedhyow na, ordnans dhe dhos adro dheworth Cesar Augustus, y talvya dhe oll an bys bos recknys. 2Cyrenius o governour Syrya pan wharfa an kensa recknans ma. 3Ha pub huny y’n bys a dravalyas dhe vos nombrys, kenyver onen dh’y dre y honen.

4Ha Josef eth yn ban ynwedh dhya Alyla dheworth Nazara bys yn Judy ha dhe cyta Davyth o gelwys Bethlem, awos ef dhe vos a deylu hag a lynaja Davyth, 5may halla va bos nyverys gans Marya y wreg ambosys, ha gans flogh o hy. 6Y wharfa pan esens y y’n tyller na, may tueth prys hy golovas. 7Hy a wrug denethy hy mab kensa ha hy a’n maylyas yn lystennow hag a’n settyas yn presep yn stabel, dre reson nag esa tyller ragthans y’n gwesty.

8Yth esa bugeleth y’n keth pow na hag y y’n gwel ow quetha aga flockys dres an nos. 9El an Arluth a dhysquedhas dhedhans ha glory an Arluth a wrug dywy oll adro hag own bras a’s teva. 10Ha’n el a leverys dhedhans, “Na bertheugh own; rag mereugh, yth esof ow try dheugh messach a lowena vras rag oll an bobel; 11rag hedhyw re bue genys dheugh yn cyta Davyth Sylwyas, hen yw an Arluth Cryst. 12Ha helma a vydh syn ragough: why a gaf an flogh byan maylys fast gans lysten hag ef a’y wroweth yn presep.” 13Ha dystough y fue gwelys warbarth gans an el nyver bras a lu nef ow praysya Dew hag ow leverel,

14“Glory dhe Dhew avan ha war an norvys cres dhe’n re na usy orth y blesya!”
15Pan wrug an eleth dyberth dhewortans bys yn nef, an vugeleth a leverys an eyl dh’y gela, “Duen ny bys yn Bethlem may hallen gweles an wharfedhyans ma re wrug an Arluth declarya dhyn.”

16Y eth dy gans toth bras ha cafus Mary ha Josef ha’n flogh a’y wroweth y’n presep. 17Pan welsons an flogh, y a dheryvas an dra re bya cowsys ortans adro dhodho. 18Kettel glowas pubonen henna, y a gemeras marth bras a whedhel an vugeleth. 19Saw Marya a sensas an taclow ma yn town yn hy holon hag ombredery anedhans. 20Nena an vugeleth a dewhelas tre arta, hag y ow praysya Dew hag orth y wordhya awos an maters oll a wrussons clowes ha gweles, poran kepar del vons y deryvys arag dorn dhedhans.


Back to the main page.
Michael Everson, Evertype, Westport, 2002-04-08